بؤلوم : 3
قصه پر درد دختری به نام سولماز <<واقعا زیباست>> ( به زبان ترکی )
پنجشنبه 10 مرداد 1392     یازار : آراز قئیدارلی
+0 به یه ن


سولماز بو گئجه کی کیمی قورخونج (ترسناک) یوخو گؤرمه میشدی. همیشه اوزونه گولومسه ین، اونو خوش سؤزلرله دیندیرن سیرانوش
خالا یوخودا اَجینه صیفتینده اونو بوغوردو. سورئن دایی نین الینده توتدوغو ایتی قیلینجدان داملا  داملا قان سوزولوردو. بو قان اونون
اوست  باشینا و ان چوخ دا گؤزلرینه چیلنمیشدی. الینده قان سوزولن قیلینج اولان سورئن دایی نین گؤزلری قان سوزولن قیلینجدان
چوخ  چوخ قورخونج گؤرونوردو. اونلارین قیزلاری اولان سوسن و روزانین اللری، اتکلری داشلا دولو ایدی. هامیسینی دا سیرانوش
خالانین الینده بوغولان سولمازین باشینا یاغدیرماغا حاضیر ایدیلر. بوتون بو دهشتلرین هامیسینا دؤزمک اولاردی، تکجه سولمازین سسی چیخیب < آنا >
 دئیه چاغیرا بیلسیدی. یاخشی کی، قیزجیغاز (بالاجا قیز) یوخودان تئز آییلدی. یوخسا، اورگی پارتلایاجاق ایدی. گؤزونو
آچاندا اؤزونو قان  تر ایچینده گؤردو. بو عذاب و ایشکنجه نین یوخو اولدوغونا سئویندی، هئچ کیمی سسله مه دی. بیلیردی کی،
سحرلر آتا  آناسی اونو یوخودا قویوب ایشه گئدیرلر. یاتاغیندان قالخماق ایسته دی، آنجاق قالخا بیلمه دی. ائله بیل اوستونه داش
قالامیشدیلار. آجی آغریدان ال  قولونو ترپده بیلمیردی. هاندان  هانا اؤزونو اله آلیب یاتاقدان قالخدی.
گونش چوخدان چیخمیشدی. هاوادا یازین نفسی دویولوردو. ائشیک ده سئرچه لرین جیویلتی سیندن قولاق توتولوردو. ائشیگه
چیخیدی کی، ال اوزونو یوووب، تویوقلارینا دن سپسین. الینی ائیوانین قیراغیندا کی لولکلی پارچا آپاراندا گؤردو کی، بوم  بوش
دور. آخی آناسی سحرلر اونو دولدورورب قویور کی، قیزی ال اوزونو یوسون. گؤردو کی، یئر یاشدی، کیمسه اونون سویونو یئره
بوشالدیب. پارچی دولدورماق اوچون حیطه دوشنده گؤردو کی، آتاسی نین دونن اَکدیگی قیزیل گول کوللارینی کیمسه سیندیریب،
ازیب. ال اوزونو یویوب آنباردان بیر سینی دن گؤتوروب تویوقلاری دودوله دی. تویوقلار گلدی. آنجاق لاری خوروزلا پاپاقلی فره
گؤزونه دیمه دی. آختاردی  آختاردی، تاپا بیلمه دی.
چای  چورگینی یئدی کوچه یه چیخدی. سوسن گیلین دوققازینا یاناشی. سوسنله روزا، ایکی باجی حیطده اویناییردیلار.
 سوسن، آی سوسن !
 سوسن، آی سوسن !
سولمازین بئش آددیملیغیندا اولان نه سوسن، نه روزا اونا های وئرمه دیلر. سولماز حیطه کئچدی، اونلارا یاناشدی.
 آخچی، بیزیم لاری خوروزلا پاپاقلی فره حیطه گلمه ییب؟
قیزلارین هئچ بیریندن سس چیخمادی. اوزلرینی یانا چئویریب آغیزلارینی بوزدولر. سولماز گؤردوگونه اینانمادی. گؤردوگو
دهشتلی یوخونو خاطیرلادی. اونا ائله گلدی کی، بو ساعات قیزلارین آناسی چیخیب او اجینه بارماقلاری ایله اونو بوغاجاق، اوندان
تامامیله اوز دؤنده رن  سوسن و روزا باشینا داش یاغدیراجاقلار. قیز قورخوب گئری دؤندو. باغی  باغچانی گزیب لاری خوروز و
پاپاقلی فرهی آختارا  آختارا، تاپا بیلمه دی. سون زامانلار تویوقلارین ایتمه سی بیرینجی دفعه دئیی لدی.…
سولماز نه تویقلارین ایتمه سینی، نه پارچین سویونون کیمسه طرفیندن داغیلماسینا، نه گول کوللاری نین سیندیریلماسینا، نه اونونلا همیشه بیر یئرده اوینایان قونشو
قیزلارین اونون چیغیریشینا سس وئرمه مه لرینه، نه ده گؤردوگو او قورخونج یوخولارا اینانا بیلمیردی
گون باتدی، آتا  آناسی ایشدن قاییتدی. قیز تویوقلارین ایتمه سینی آتا  آناسینا، گؤردوگو قورخونج یوخوسونو ایسه آناسینا
سؤیله دی. اونا ائله گلدی کی، تویوقلارین ایتمه سینه آتاسی اوندان چوخ ناراحات اولدو. اونا ائله گلدی کی، سؤیله دیگی بو قورخونج
یوخودان آناسی اوندان دا چوخ قورخدو. آنجاق نه دن سه هئچ بیری دینیب  دانیشمادی.
بالاجا سولماز بونا چوخ تعجوب ائدیردی.
سون گونلر نه سیرانوش خالا اونلارا گلیردی، نه ده آناسی اونلارا گئدیردی. حتی بیر گون گؤزو ایله گؤردو کی، سورئنله اوز
اوزه گلن آتاسی سالاملاشمادان اوندان یان توتوب کئچدی.
قیز یئنی سحری گون اؤز عادتینجه یوخودان دوردو، اَل  اوزونو یودو، تویوقلاری سسله ییب دن سپدی. سونرا داریخیب
کوچه یه کئچدی. اؤز عادتینجه بیر ده گؤردو کی، سوسن گیلین حیطینده دیر. آرالاریندا هئچ نه اولمامیش کیمی اوزونو اونا توتاراق :
 آخچی، آی آخچی، گئدک دره یه بنؤوشه ییغماغا  دئدی.
 آخچی، آی آخچی …
سوسن دن سس چیخمادی. او سولمازا دیلینی چیخارداراق،قاچیب باجی سی روزانین یانینا گئتدی. سولماز کور  پئشمان اونلارین حیطیندن چیخدی. یازیق قیز بیلمیردی کیمینله اویناسین، هارا گئتسین. اوزو آشاغی یوللاندی، گلیب دره یه یئتیشدی. کول
دیبیندن یئنیجه آچیلیب  بویلانان بنؤوشه لری گؤروب سئویندی. بنؤوشه لر بوینونو بوکه رک ائله بیل بو کیچیک قیزین یولونو
گؤزله ییردیلر.
سولماز اَلینی اوزالدیب کول دیبیندن بیر بنؤوشه اوزدو. او اووجوندان بو اووجونا قویاراق، بو اینجه چیچگی دویونجا تاماشا
ائله دی. سونرا دا دسته باغلاماق اوچون اونلاری درمه گه باشلادی. نه آز، نه چوخ، ایکی دسته باغلادی.
 بیری آتامین، بیری ده آنامین  دئدی.
سولماز گئری دؤنن ده ائله بیل سوسنله روزا پوسقودا دایانمیشدیلار. دوققازلاریندا قیزین قاباغینی کسدیلر. بنؤوشه
دسته لری نین ایکی سینی ده اونون اَلیندن آلیب، اؤزونو ده دؤیدولر.
سولماز آغلایا  آغلایا ائوه دؤندو. همین گوندن سولمازین قارا گونلری باشلادی. قورخوسوندان گولونون آلینماسینی،
دؤیولمه سینی آتا  آناسینا دئمه دی. او بیلیردی کی، بو کندده ائرمنی لر اولاردان چوخدو. او بیلیردی کی، قوهوم  اقربالاری بو دوغما
کندی چوخدان ترک ائتمیشدیلر. او بیلیردی کی، بو حد ده قورخولارا دؤزمه ییب بیر گون اونلار دا بو دوغما اوجاقلارینی
ترک ائتمه لی اولاجاقلار سولماز ایندی نه گئجه عیفریته صیفتینده اونو بوغان سیرانوش خالادان، نه ده قیلینجیندان قان دامان سورئن دایی دان
اینجیمیردی. هئچ روزادان دا بیر او قدر اینجیمیردی. اونا درد اولان سوسن ین دؤنوکلوگو ایدی. آخی سوسن هر یاز گلنده اؤزو اونو
سسله ییب دره یه بنؤوشه ییغماغا گئدردی. آخی، سوسن دردیگی بنؤوشه لردن باغلادیغی دسته نین بیرینجی سینی سولمازا وئرردی.
آخی اونلار ایکی سی ده بو پاییز بیرلیکده مکتبه گئده جکدیلر. آخی آناسی سولمازا تیکدیگی گوللو ایپک دوندان بیرینی ده سوسنه
تیکمیشدی. آخی، اونلار طؤوله تیکنده ایمه جیلیکله اَن چوخ جان یاندیران آتاسی اولموشدو. سولماز بو سوال لارین بورولغانیندا بوغولوب قالیر، بیر یانا چیخا بیلمه ییردی.
بو دهشتلی سواللارین بورولغانلاریندا باتیب بوغولان تکجه سولماز دئییل دی، هم ده اونون آتا  آنا سی ایدی. سولماز نئچه گون
ایدی تکلیگه دؤزوردو. آنجاق بو سحر صبری لاپ توکندی. آیاقلارینی سورویه  سورویه سوسن گیله گئتدی. سوسن حیطده تک
اویناییردی. بیر آیاق  بیر آیاق گئدیب اونا یاناشدی و اؤزونو توپلاییب :
 آی آخچی، من سنه نه پیسلیک ائله میشم؟  دئدی.
سوسن اوزونو یانا چئویریب، سولماز اوندان ال چکمه دی. سوالینی بیر ده تیکرار ائتدی. نهایت، سوسن دیللندی:
 سن تورک سن  دئدی.
 سیز بیزیم دوشمنیمیزسیز. آنام دئییر کی، سنینله اویناماییم.
سولماز باخدی  باخدی، بو قیزین سؤزلریندن هئچ نه آنلامادی. نه تورک سؤزونو، نه ده دوشمن سؤزونو. یئنه کور  پئشمان
ائولرینه دؤندو. آخشام آتاسی ایشدن گلنده اونون بوینونا سریلیب سوروشدو :
 آتا، دوشمن نه دیر؟
آتاسی بیر قدر قورخدو، بیلمه دی قیزینا نه جاواب وئرسین.
  قیزیم، بو سؤزو کیمدن ائشیتمیسن؟
 سوسن دن. او دئدی کی، بیز دوشمنیک.
 قیزیم دوشمن اونلاردی، بیز دوستوق.
 بس تورک کیمدیر؟
 تورک بیزیک، قیزیم.
 بس بیز آذربایجانلی دئییلیک؟
 قیزیم، آذربایجان بیزیم توپراغیمیزین آدی دیر بونا گؤره بیزه آذربایجان تورکو دئییرلر. بؤیوگنده بونلارین هامیسینی
بیله جک سن.
آتا بو سؤزلری دئدیکجه قهر اونو بوغوردو. گؤزلری یاشلا دولوب  بوشالیردی. بو زامان ائله کیمسه چپرین اوستوندن،
سیز تورکلره کندی بوشاتماق اوچون » . گؤزونون قاباغیندا حیطه بیر ورق یازیلی کاغیذ آتدی. آتا جلد کاغیذی گؤتوروب اوخودو
«! اوچ گون واخت وئریلیر. گئتمه سیز، بختینیزدن کوسون
آتانی ائله بیل ایلدیریم ووردو. بوتون ائو  ائشیک، حیط  باجا باشینا فیرلاندی. همین مکتوبدان سونرا آتا  آنا، بالا ائودن
چیخمالیدیلار. گئجه نی  گونوزه قاتیب ییر  ییغیش ائله دیلر.
وئریلن وعده سحری گون تامام اولوردو. اونلار بو آخشام قارانلیق دوشن کیمی داغلا، داشلا آشاغی قاچمالی ایدیلر، هر اوچو پار
 پالتارلارینی اوست  اوسته گئیینمیشدیلر. آتا  آنا هره سی ایکی چانتا، ایکی باغلاما دوزلتمیشدی. تویوقلارینی هیندن، ایتلری
زنجیردن آچیب بوراخماق قالیردی.
آتا ائله بیل اؤز الیله اکیب  یئتیشدیردیگی آغاجلارلا ویداعلاشیردی. آنا گؤزو یاشلی حالدا آستانادان بایاتی دئییب خانیمانی ایله ویداعلاشیردی. سولماز ایسه گؤزه دیمیردی.
غافیلدان اونلارین ائولر ینین اوستوندن گولله لر آچیلماغا باشلادی. آتادا، آنادا اؤزلرینی ایتیردی. آتش چوخالدی، گولله
یاغیش کیمی یاغماغا باشلادی. آتا  آنا دونن دن حاضیرلادیغی چانتالارینی گؤتورمگه، ایتلرینی زنجیردن، تویوقلارینی هیندن بئله
آچیب بوراخماغا ماجال تاپمادیلار. تالاش ایچینده آختاردیلار. قیز ائله بیل یوخا چیخمیش ایدی. آتیلان آتشلر ایسه اونلارا آمان
وئرمیردی. باغین آیاغینا دوغرو، قره بویو قاچماغا باشلادیلار. چوخ اوزاقلاشاندان سونرا بیر تپه نین اوستونه چیخیب ائولرینه طرف
بویلاندیلار. گؤزلرینه اینانمادیلار. ائولری اود  آلوو ایچریسینده آلیشیب یانیردی. آتا دریندن آه چکدی :
آی نامرد سورئن  دئدی.
 بو سنین ایشین ایدی. یقین اوشاغی دا اؤلدوره جکلر.
آرتیق اونلارین آیاقلاری یئر توتموردو. قونشو کندلردن ده دره بویو قاچیب آشاغییا تؤکولوردولر. آتا نه قدر تأکید ائدیردیسه،
آنانین بئلی بوکولو حالدا اوتوردوغو یئردن ترپده  بیلمیردی.
- هئچ هارا گئدن دئییلم. بالاملا بوردا اؤله جگم.
- گئجه نی بو سویوغون سازاغین ایچینده دیری گؤزلو آچدیلار. قورخودان سسلرینی چیخاریب دویونجا آغلایا دا
بیلمه ییردیلر. کندین ایتلری سحره کیمی اولاشیردی.
- دان یئری سؤکولنده آتا آنانی زورلا راضی سالیب اوشاغین دالینجا یوللاندی. آیین آیدینلیغی اولدوغوندان سحر تورانلیغی
آیدین گؤرونوردو.آتا باغلاری نین قاباغیندا دایانیب ائولری نین، طؤوله لری نین سون توستولرینه تاماشا ائتدی. جسارت ائدیب
ائولرینه یاخین دوشه بیلمه دی. قیزی سولمازین ساغ قالماسینا بوتون اومودو تامام کسیلدی. کسه جیغیرلا گئری دؤنن ده آرتیق
سحر آچیلمیشدی. کول دیبیندن یئنیجه آچیلمیش بنؤوشه لر بویلانیردی. آتا گؤزو یاشلی قیزینی خاطیرلادی. آخی سولماز هر یاز
گلنده بو اینجه بنؤوشه لردن دسته باغلاییب اونا باغیشلایاردی.
- آتا یول گؤزله ین آنایا نه جاواب وئره جگینی بیلمیردی. و اونو یئریندن قالدیریب، قاچانلار دسته سینه نئجه قوشاجاغینی بیلمیردی. فیکیر  خیال ایچینده، قارشی سیندا کی کولون دیبینده بیر قارالتی گؤردو. یاخین گلدی. بو قیز اوشاغی نین جسدی ایدی.
شاختادان قارالیب بوزارمیش بو جسد اونون جیگر پاراسی اولان سولماز ایدی. قیز آل قانین ایچینده یدی. کؤکسونده نئچه  نئچه
گولله یاراسی وار ایدی. سیخیلمیش اووجوندا ایسه قانلی بنؤوشه چیچکلری !
آتا گؤزلرینه اینانمادی. جسدی پالتاریندان تانیسادا، قالدیریب اوزونه باخدی. دیزلری قاتلاندی، یئره اوتوردو. بالاسی نین اوزونه
حئیرتله باخدی. سولمازین بارماقلارین آراسیندان قانلی بنؤوشه لری گؤتوروب وار سسیله هایقیرماق، بو وحشی لیگی، بو
عدالت سیزلیگی بوتون دونیایا جار چکمک ایسته دی. آنجاق باجارمادی.
قیزی نین قوللارینی اوستونه قالدیریب، شاختادان دونوب بوزارمیش اوزوندن اؤپدو. سونرا آنانی قویوب گلدیگی سمته
یوللاندی


 



یارپاق لار :